ترکی بیر چشمه ایسه، من اونی دریا ائله دیم،
بیر سویوق معرکه نی محشر کبرا ائله دیم.
بیر ایشیلتیدی سها اولدوزی تک گورسنمز،
گوز یاشیملا من اونی عقد ثریا ائله دیم.
امیدیم وار که بو دریا هله اقیانوس اولا،
اونا ضامن بو زمینه که مهیا ائله دیم.
عرفانا چاتماسا شعر و ادب ابقا اولماز،
من ده عرفانه چاتیب، شعریمی ابقا ائله دیم.
ابدیتله یاناشدیم دوغولا حافظه تای،
شیرازین شاهچراغین تبریزه اهدا ائله دیم.
ترکی نین جانینی آلمیشدی حیاسیز طاغوت،
من حیات آلدیم اونا، حق ایچون احیا ائله دیم.
(فیض روح القدس) اولدی مددیم حافظ تک،
من ده حافظ کیمی اعجاز مسیحا ائله دیم.
قمه قداره لر آغزیندا دیل اولمیشدی سو گوش،
من سه وینج ائتدیم اونی، خنجری خرما ائله دیم.
ایندی گویلر ده گوزل صفله صفا ایله گزیر،
منجلابلاردا اوزن اردگی دورنا ائله دیم.
باخ که (حیدر بابا) افسانه تک اولموش بیر قاف،
من کیچیک بیر داغی سرمنزل عنقا ائله دیم.
بوردا (روشن ضمیرین) ده هنرین یاد ائده لیم،
من اونون دا قلمین طوطی گویا ائله دیم.
نه تک ایراندا منیم ولوله سالمیش قلمیم،
باخ که ترکیه ده، قافقاز دا نه غوغا ائله دیم.
باخ که تهراندا نه فرزانه لر اولموش واله،
باخ که تبریز ده نه شاعرلری شیدا ائله دیم.
هم (سهندیه) سهندین داغین ائتدی باش اوجا،
هم من ئوز قارداشیمین حقینی ایفا ائله دیم.
آجی دیللرده شیرین ترکی اولوردی حنظل،
من شیرین دیللرده قاتدیم اونی حلوا ائله دیم.
هر نه قالمیشدی کئچنلردن اونا بال پتگی،
اریدیب موملو بالین شهد مصفا ائله دیم.
ترکی، واللاه، آنالار اوخشاغی، لایلای دیلی دیر،
دردیمی من بو دوا ایله مداوا ائله دیم.
شهریار، حیف ساووخدیر بو دگیرمان هله ده،
دارتماغا یوخدی دنی، من ده مدارا ائله دیم.
استاد شهریار
توپلایان: رسول غفارپور در
20 Jul 2008 ساهات
1:0 PM |
ثابت لینک |
