هرچند قوتولماق هله یوخ دار لیغیمیزدان
اما بیر آزادلیق دوغولوب وارلیغیمیزدان
(وارلیق) نه بیزیم تکجه آزادلیق قوشوموزدیر
بیر مژده ده وئرمیش بیزه همکارلیغیمیزدان
به به نه شیرین دیللی، بو جنت قوشی، طوطی
قندین آلیب الهام له دیندار لیغیمیزدان
دیل آچمادا کارلیق دا گئدر، کورلوغوموزدا
چون لاللیغیمیز دوغموش ایدی کارلیغیمیزدان
دشمن بیزی ال بیر گؤره، تسلیم اولی ناچار
تسلیم اولوروق دشمنه ناچار لیغیمیزدان
هر انقلابین وورـ ییخی صون بنالیق ایسته ر
دستور گرگ آلماق داها معمار لیغیمیزدان
هشیار اولاسوز، دشمنی مغلوب ائده جکسیز
دشمنلریمیز قورخوری هشیار لیغیمیزدان
بیرلیک یارادون، سؤز بیر اولار بیز کیشی لرده
یوخلوقلاریمیز بیتدیره جک وار لیغیمیزدان
استاد شهریار
توپلایان: رسول غفارپور در
20 Aug 2008 ساهات
9:30 PM |
ثابت لینک |
