اووچو باخیشلارین ایلدیریم کیمی،

شاخدیقجا جانلاری کوله دؤنده ریر.

کیمسه نی اؤلدورسه، یاخسادا کیمی،

منه حیات وئریر، امید گؤستریر.

 

کؤنول قوشلارینا ساللانیب باخماز،

اسلان شکارینا چیخیب بو جئیران.

طرلان دا اوخوندان جان قورتارانماز،

یایووا، اوخووا، اؤزووه قوربان.

 

اوخووا گلندن زاواللی سینه،

اورک قان ایچینده ال- آیاق چالیر.

او، ظالم گؤزلردن یالواریم کیمه،

یولسوز نه دیل قانیر، نه تانری تانیر.

 

عشقینله کوکلنن بو شاعیر کؤنلوم،

بیر سازا دؤنوبدور، مضرابی سنسن.

چال گولوم، چال گولوم الیوه دؤنوم،

قویما، بو سحرکار ساز، دوشه سسدن.

 

شعریمین پریسی، شعریمین قیزی،

گئتمه نظریمدن، گئتمه اؤنومدن.

قارنلیق گئجه مین سنسن اولدوزو،

بختیمین اولدوزو باتار، سن گئتسن.

 

شیمشک باخیشلارین شاخدیر اوستومه،

شاخدیر، قوی اود آلسین بو سؤنوک اوجاق،

منی یاندیرماقدان قورخما، چکینمه،

من یانسام، یوردوموز ایشیقلاناجاق.

 

سهند سینه سیدیر، دلی جیرانیم،

ایچریسین اودلا، ائشیگین اودلا.

قوی عشق آتشینده آلیشیم، یانیم،

اوجاغین حؤرمتی اودلادیر، اودلا!

 

مراغالی شاعیر اوستاد بولود قاراچورلو (سهند)

توپلایان: رسول غفارپور در 29 Sep 2008 ساهات 1:46 AM | ثابت لینک |